Istoria

CONFEDERAÇÃO UNIDADE DAS ORGANIZAÇÕES FRENTE CAIXA CLANDESTINA EM TIMOR-LESTE (CUOFCC-TL) mai husi organizasaun rezisténsia masa, Caixa Clandestina, Sub-Caixa, Grupo rezisténsia direita no indireita hodi luta ba Independénsia Timor-Leste.

Antes Konfederasaun eziste, grupo kiik ida husi orgaun Diretiva Organizasaun Sagrada Familia-OSF nebe’e hahu enkontru iha loron 04 fulan Janeiru tinan 2019, iha Irmaun Kasian nia rezidensia Becora-Mota Klaran, hodi hasai rezolusaun ida, atu bele halo atividade konsolidasaun ba membru sira rezisténsia Organizasaun Sagrada Família iha anivel nasional, husi munisipiu 12 inklui RAEOA.

Orgaun diretiva Organizasaun Sagrada Família dala ida tan sagrifika sira nia Aan iha era Independénsia hodi buka tuir fali ninia membru sira nebe’e durante ne’e despersadu iha era Independénsia, maske husi orgaun ezekutivu Organizasaun Sagrada Família lá fó apoiu orsamentu, maibé sira uza rásik sira nia osan hodi han hemu iha dalan, fatin deskansa, dalaruma sira kesi kabun hodi hala’o misaun terus ida ne’e, tamba tuir sira nia hanoin laiha tan dalan seluk atu ema rezisténsia iha unidade hanesan tempu okupasaun hodi luta ba ukun rasik Aan, tamba rezisténsia nia unidade miis ba bebeik, lakon fia ba malu, lakon fiar ba Lider sira, hodi ema aproveita soran rezisténsai ba malu, tamba moris lá hanesan ona.

Depois konsolidasaun ne’e remata, responsável husi orgaun diretiva OSF inklui fundador OSF “Cornelio Gama-L7” hato’o relatóriu ba konselheiru másimu OSF Sub-Xefe Estadu Mayor das FALINTIL “Tito da Costa-LERE ANAN TIMUR” iha loron 29 fulan Setembru tinan 2019.

Hafoin Konselheiru simu tiha relatóriu refere, konselheiru kontente hodi fó hanoin katak, se bele kontinua konsolida organizasaun rezisténsia hotu nebe’e uluk luta ba Independénsia atu bele hamutuk hanesan uluk, ne’e hanesan motivasaun ida ba orgaun diretiva no fundador Organizasaun Sagrada Família atu bele halo análiza no tetu hamutuk ho responsável sira. Liu deit semana balun, orgaun diretiva OSF hala’o kedas reunaiun ho responsável, fundador organizasoens no caixa clandestina sira, atu tau hanoin hamutuk hodi forma komisaun konjunta ida atu bele kria unidade no paz hanesan tempu okupasaun.

Nune’e organizasaun rezisténsia no caixa clandestina hamutuk halo komunikadu imprensa hasoru Ministério Ensino Superior Ciénsia no Cultura kona-ba veteranu/a no kombatentes sira nia oan nebe’e hakarak asesu ba UNTL. Organizasaun rezisténsia sira nebe’e hamutuk halo Komunikadu Imprensa mak hanesan: SAGRADA FAMÍLIA, HAOK, SANTO ANTÓNIO,    ORJUMATIL, ORGAUN 8, UNIDADE NASIONAL, HABURAS, DENTRI JHS, SAFARI, NOVE-NOVE (99),  ZERO UM (01), OJETIL, OBJELATIL, FITUN no  CAIXA CLANDESTINA SIRA.

Liu tiha komunikadu imprensa ne’e, organizasaun rezisténsia halibur malu kedas hodi harii komisaun konjunta ida atu bele haree esbosu ida ba organizasaun rezisténsia sira hodi bele hamutuk harii uma mahon ida, naran ida hanesan sumrina/aihun ida atu organizasaun rezisténsia sira bele hamutuk, nune’e mak foin bele hala’o atividade no mos bele sai parseiru ida diak ba Governu no Estadu hodi kontribui ba dezenvolvimentu nasional, tamba tempu invazaun organizasaun sira ne’e hamutuk hodi luta ba ukun rasik Aan, depois ukun Aan sei hamutuk fali hodi luta ba dezenvolvimentu nasional tuir mehi Heroi sira nia.

Familia rezisténsia (Senhor Julio Oliveira-Watumisa) nebe’e ho laran diak no pasiensia nafatin oferese ninia uma, atu organizasoens rezisténsia sira bele halibur malu, reuniaun, diskute no kria estrutura ba Komisaun Konjunta atu bele organiza no fahe sevisu ba malu, prepara esbosu estatutu hodi bele halo Aprovasaun. Antes atu prepara esbosu ne’e Prezidente Komisaun Konjunta hato’o karta aseitasaun ba Prezidente/Fundador organizasoens no Caixa Clandestina sira atu delega ninia membru na’in 5 kada organizasaun atu involve iha preparasaun, reuniaun, debate Estatutu no deside, tamba Komisaun Konjunta ne’e hanesan komisaun preparativus ba Estatutu no estrutura ezekutivu hodi lori organizasaun rezisténsia no caixa clandetina ninia aspirasaun ba dezenvolmimentu nasionál no ba moris diak povu nian.

Depois Prezidente/Fundador organizasaun no Caixa Clandestina sira delega ninia membrus nain 5 mai, komisaun konjuta reuni kedas preparasaun esbosu hodi kontinua ba halo diskusaun, iha diskusaun hotu-hotu deside naran “CONFEDERAÇÃO UNIDADE DAS ORGANIZAÇÕES FRENTE CAIXA CLANDESTINA EM TIMOR-LESTE (CUOFCC-TL)” ho nia emblema própriu nebe’e dadauk tau hela iha Kabichalu CUOFCC-TL (Desenha husi: Mariano Jacinto Soares-LAKUTUA (M), maibé antes ne’e komisaun konjunta halibur Draff estatutu 4 husi tekniku sira hodi diskute atu aprova sai ida deit, maske matenek limitadu, maibé ida ne’e mak nafatin iha ema rezisténsia nia komitmentu atu kontribui nafatin ba luta foun ida ba povu nia moris diak, ikus mai Draff 4 ne’e akumula sai Draff ida mak naran temi iha leten (CUOFCC-TL).

Hafoin Estatutu CONFEDERAÇÃO UNIDADE DAS ORGANIZAÇÕES FRENTE CAIXA CLANDESTINA EM TIMOR-LESTE (CUOFCC-TL) no nia Estrutura hetan apresiasaun ho votus UNANIMIDADE liu husi Asembleia Extraordinariu iha loron 23 fulan Agostu tinan 2020 husi Prezidente/Fundador da Organizasaun no Caixa Clandestina, Komisaun Konjunta deside atu bele ba rejistu iha Diresaun Notaridu, Ministério da Justisa.

Molok Estatutu ne’e lori ba iha Ministério da Justisa, Prezidente Eleito kontaktu kedas ho Prezidentes/Fundadores da Organizasoens no Caixa Clandestina atu asina tan karta aseitasaun atu bele hatama naran organizasaun rezisténsia no caixa clandestina iha Estatutu hodi aprezenta ba Notaridu tuir Legalidade Administrasaun Jurídiku, tamba iha momentu diskusaun reprezentante sira nebe’e Prezidente/Fundador no Caixa Clandestin delega mai lá dun ativu, nune’e presiza fali reverifika naran hodi hatama ba Estatutu CONFEDERAÇÃO UNIDADE DAS ORGANIZAÇÕES FRENTE CAIXA CLANDESTINA EM TIMOR-LESTE (CUOFCC-TL) atu sai Legal, no tuir administrasaun legal iha nasaun RDTL, maibé organizasaun rezisténsia sira nebe’e rejeita atu asina karta aseitasaun mak hanesan OJETIL, OBJELATIL no FITUN.

Nune’e iha loron 01 fulan Outubru tinan 2020, Prezidente elitu ho nia ekipa kontinua hamutuk ho Fundadores/Prezidentes das organizasoens no Caixa Clandestina hala’o audensia ho Prezidente da Republika RDTL (Dr. Francisco Guterres, LU-OLO) hanesan konhesimentu ida ba Prezidente da Republika nebe’e mos hanesan Conselhu  Diretiva Fretilin (CDF) iha tempu rezisténsia hodi husu SE.Prezidente nia hanoin.

Atu kontinua ba rejistu iha Diresaun Nasional Notariado-Ministério da Justisa, Prezidente eleitu kontinua hala’o audensia ho Sua Excia Ministro da Justisa atu bele ajuda halais prosesu lagalizasaun ba Estatutu CUOFCC-TL. Sua Excia Ministro da Justisa no nia Estrutura nia ajuda Konfederasaun nia Estatutu hetan nia lagalidade no públika iha JORNAL DA REPÚBLICA, 11 fulan Fevereiru tinan 2021, No. 6 SERI II Pajina 173.

Depois hetan tiha legalidade nebe’e públika ona husi Jornal da República, Estrutura CUOFCC-TL hamutuk ho Prezidente/Fundador da organizasaun rezisténsia no Caixa Clandestina lori kedas Legalidade ne’e hodi aprezenta ba Conselhu Combatentes Libertasaun Nasional-CCLN hanesan konhesimentu tamba CCLN mak sai hanesan uma fukun ba rezisténsia sira (FC, FA no FD).

Ho legalidade ne’e CUOFCC-TL bele halo atividade tuir planu no programa nebe’e iha, maibé nafatin hetan dezafiu, tamba moras COVID-19 nebe’e mundu infrenta, liliu Timor-Leste nebe’e aplika hela serka sanitária no konfinamentu obrigatóriu, halo atividade estadu no privadu totalmente paradu, la’os ida ne’e deit, maibé dezastre boot mosu tan iha loron 04 fulan Abril tinan 2021, afeita ba povu no nasaun hetan sofrementu inundasaun (KALAMIDADE) hodi hamate ema lubuk ida, no sasan, uma barak hetan estragus iha kalamidade ne’e.

CONFEDERAÇÃO UNIDADE DAS ORGANIZAÇÕES FRENTE CAIXA CLANDESTINA EM TIMOR-LESTE (CUOFCC-TL) laiha kbiit no forsa iha situasaun ne’e, maibé entidade balun sei iha hanoin diak atu fo ajudus ba ita nia populasaun afeitadus sira liu husi CUOFCC-TL, entidades sira mak hanesan; ACCCTL, CCLN, organizasaun rezisténsia UNIDADES NASIONAL, CAIXA AILALETEK no Lojas balun. Entidade sira ne’e fo apoiu: Fos, Supermi, Mina, Biti, manta, Rinso, Sabun, Pastadente, sampho no seluk tan, ho ida ne’e Konfederasaun hatutan ba ita nia maluk nebe’e afeitadu liu, maske la responde ba populasaun hotu, tamba Konfederasaun hanesan labarik no sei nurak liu, maske organizasaun rezisténsia nebe’e hamutuk ne’e tuan no eziste klaur ona (hahu luta ba libertasaun nasional), maibé foin mak eziste fali iha era Independénsia kuaze tinan 19.

Iha sorin seluk CONFEDERAÇÃO UNIDADE DAS ORGANIZAÇÕES FRENTE CAIXA CLANDESTINA EM TIMOR-LESTE (CUOFCC-TL) hetan parseiru balun husi Portugal, hodi bele servisu hamutuk ba futuru, maibé nafatin hetan obstaklu tamba atividade nasaun nia paradu, eh Konfederasaun rasik laiha osan atu loke konta, maibé grasas Nai Maromak nian, 1º Vise-Prezidente Konfederasaun (Aquelina Imaculada Pereira-Peregrina/NINA)  nebe’e asume hela kargu nudar Prezidente Interina iha situasaun ne’e hola inisiativa, uza nia osan rásik hodi  loke konta ba CUOFCC-TL atu bele responde parseiru refere karik nesecita, maibé laiha rezultadu.

Ho grasas Nai Maromak, Matebian, Saudozo/a sira no Natureza Lulik sira CUOFCC’TL bele hetan apoiu husi Apoiu Sociedade Civil-Gabinete Primeiru Ministru nian, nebe’e iha fulan janeiru tinan 2022 hetan nia Autonomia ba fali SASCAS, ho ida ne’e CUOFCC-TL hala’o nia atividade tuir programa ne’e aprova husi SASCAS ba programa konsolidasaun no konferensia nasional, maibé ikus mai fundador/prezidente organizasoens no fundador uniku sira deside ANULA tiha konferensia nasional ba REUNIAUN ALARGADA.

Ikus liu CUOFCC-TL hala’o ninia serimónia aniversáriu dala uluk (Primeiru Aniversáriu), iha loron 11 fulan Fevereiru tinan 2022 ho sucesu maske ho simples. Iha serimónia aniversáriu ba dala uluk ne’e ho nia agenda mak; 1) Komunikadu Imprensa, 2) Reflesaun ho nia topiku “DEZAFIU NO PROGRESU SAI XAVE IMPORTANTE BA SERVISU DIAK IHA FUTURU”.